Nunap iluani pisiumassuseq nunanillu allanik niueqateqarneq
Pisiumassuseq tamakkiisoq 2012-mi 15,5 pct.-inik annikilleriarpoq. Pisiumassutsip annikilleriarnera nunap iluani niuernermeersoq ineriartornermut taamatut ineriartortoqarneranut tapertaavoq, pisiumassutsillu annikilleriarnera avataanit eqqussuinerup annikilleriarnermik kinguneqarpoq, taanna 31,1 pct.-mik apparmat.
Pisiumassuseq pilersuinerlu annertussutsimikkut assigiittarput, taamaammallu nikerarneri assigiimmik ingerlasarlutik. Pisiumassutsimi qaffariarneq nunap avataanut niueqateqarnermit imaluunniit nunap iluani pisiumassutsimit aallaaveqarsinnaavoq. Pilersuinermi annertuseriaat avataanit eqqussuinermit imaluunniit nunap iluani naleqarnerulersitsinermit, BNP-mit matussuserneqarsinnaavoq.
Piffissat pisiumassutsip qaffakkiartupiloorfigisai amerlanertigut avataaniit eqqussuinerup assingusumik qaffariarneranik kinguneqartarput, tamatumunnga peqqutaavoq piffissami naannerusumi pilersuinerup ineriartorneranut BNP-p matussusiisinnaassusaata killeqartarnera. Taamatut pisoqartarnera 2008-mi 2010-milu pisunut assinguvoq, tassani pisiumassutsip qaffariapiloornerata kingunerimmagu avataaniit eqqussuinerup qaffariapiloornera.
Titartagaq 2.1. Ukiumoortumik pisiumassutsimi pilersuinermilu ineriartornivimmut alliartortitseqataasut
Malugiuk: 2003-2010-mi kisitsisit inaarutaasuupput, 2011-2012-mili kisitsigallarnerullutik.
Najoqqutaq: Naatsorsueqqissaartarfik, http://bank.stat.gl/nrn11